Ekonomia eta Finantza Informazioa
Arriskuen kudeaketa
Arriskuaren profil global egokia mantentzea Kutxabank Taldearen kudeaketaren funtsezko elementu bat da; zeren, finean, bermerik onena da bere jarduerak eta, hedaduraz, gizarteari egiten dion ekarpenak, bereziki bere jabeei (banku fundazioei) banatutako dibidenduen bidez, irauteko.
Ildo horretan, Bankuaren gobernu organoek arriskuen arloan ezarritako gidalerro estrategikoek, Kutxabank Taldearen Arriskuarekiko Joeraren Esparruan formulatuak, ezartzen dute helburu korporatibo gisa arrisku ertain-txikiko profil bat aurkeztu behar dela, honetan guztian oinarrituta: arriskuen kudeaketa azpiegitura batean, barne gobernantzaren eta baliabide material eta giza baliabideen eskuragarritasunaren baldintzetan, negozio ereduari egokitutako kapital eta likidezia oinarri batean, eta arriskuak hartzeko politika zuhur batean.
Aipatutako dokumentuak arriskuarekiko joera mailaren formulazio generikoa osatzen du, helburu kualitatibo eta kuantitatibo zehatzagoak ezarrita. Ildo kualitatiboan, Taldearen arrisku profila ezaugarritzen duten oinarrizko ezaugarri hauek identifikatu dira:
- Taldeak bere enpresa eredua epe luzeko negozio ildo bideragarrietan oinarritu behar du, egiturazko indarguneetan babestuta eta arrisku maila kontrolatuekin kudeatuta.
- Taldearen gobernu egiturak lerrokatze maila oso altua izan behar du alorreko nazioarteko estandar nagusiekiko, eta bermatu behar du gobernu organoek beren funtzioak egin ahal izatea arriskua kudeatzeko alorrean, behar diren gaikuntza eta independentzia mailekin.
- Taldearen arriskua kudeatzeko azpiegiturak bere barnean hartu behar ditu esposizioa duen arrisku mota guztiak, eta bere konplexutasun eta garrantzi mailarekiko kontrol esparru proportzionalak izan behar ditu.
- Taldeak behar besteko kapital oinarri bat mantendu behar du bere arrisku zorroari lotutako kapital errekerimenduak betetzeko, arautzeko, gainbegiratzeko eta barneko ikuspegi hirukoitz batetik, eta gainera behar beste kapital soberakin izan behar ditu betekizun hori bermatzeko egoera kaltegarrietan, bereziki.
- Taldeak finantzazioaren handizkako merkatuen neurrizko mendekotasuna zehazten duen egitura finantzarioa mantendu behar du, eta egitura horrek eskura dauden aktibo likidoak izan behar ditu eta behar besteko finantzazio iturri alternatiboak, bere ordainketa konpromisoak betetzen direla bermatzeko denbora luze batez, baita likideziaren ikuspegitik bereziki kaltegarriak diren egoeretan ere.
Gainera, Kutxabank Taldearen Arriskuarekiko Joeraren Esparruan, era laburrean, arriskuaren profil globalaren bilakaera adierazteko gai diren hainbat arrisku adierazle identifikatzen dira, eta helburu korporatibo eta behaketa zein alerta atalase berdinetarako ezartzen dira, eta horiek urratzen badira automatikoki aktibatuko lituzkete dagozkien kudeaketa protokoloak. Adierazleen Multzo Zentral honetako arrisku adierazleen bilakaeraren aldizkako segimenduak bermatzen du Bankuaren gobernu organoek sarbidea izatea Taldearen arrisku profil globalaren bilakaeraren ikuspegi laburtu eta eguneratu batera.
Taldean arrisku kudeaketaren barne gobernantzaren ildo nagusiak hainbat eduki gehigarri formalizatuta osatzen dira:
- Arriskuaren Kudeaketaren Politika Orokor bat ezartzea, Taldearen jarduketa ildoak jasotzen dituztenak arrisku profil globalaren kudeaketari dagokionez.
- Arriskuen tipologia korporatibo bat zehaztea.
- Arrisku mota bakoitzerako kontuan izan beharreko arrisku maila nagusiak ezartzea.
- Erakundearen barnean ardura esleitzea, ardura eremu bakoitzerako, zehaztutako arrisku moten eta ezarritako arrisku mailen arteko konbinazioaren emaitza gisa.
- Merkatuaren informazio politika bat formulatzea arriskuaren alorrean.
- Politika eskuliburu espezifikoak onartzea arrisku mota garrantzitsuenetarako.
- Arrisku mota desberdinen bilakaera monitorizatzeko sistema bat diseinatzea.
Eremu arrunteko arrisku kudeaketaren barne gobernua, zeinaren oinarrizko gidalerroak Taldearen Arriskuarekiko Jarreraren Esparruan ezarri diren, salbuespen egoeretarako aurreikusitako gobernantza batekin osatzen da, Taldearen Recovery Plan-ean jasota dagoena. Dokumentu honetan balizko hainbat egoeretan arriskua nola kudeatu adierazten da. Egoera horietan, ezinbesteko konstanteak nabarmen hondatu ondoren, baina oraindik kaudimena eta likidezia arautu eta gainbegiratzeko errekerimenduak betetzeko mailetan, Taldea saiatuko litzateke egoera bere baliabideen bidez bideratzen, salbuespenezko kudeaketa autonomoaren eremuan.
Taldeak dituen arriskuei aurre egiteko duen kapital oinarriari dagokionez, aipatu behar da, 2018ko abenduaren 31n, Kutxabank Taldearen Guztizko Kapitalaren Ratioa, indarrean dagoen legerian aurreikusitako egutegi iragankorretan jasotako espezifikoen arabera kalkulatua (phased-in bertsioa) % 16,1ekoa izan zela, 2017ko itxierako % 15,7tik gorakoa eta Kutxabank Taldearentzat 2019rako EBZk arautzeko eta gainbegiratzeko ezarritako errekerimenduetatik oso gora, horiek % 11,7n ezarri baitira (% 1,20ko Zutabeko errekerimendu gainbegiratzaile bat eta kapitala kontserbatzeko % 2,5eko kontserbazio koltxoi bat barne).
Jakina den bezala, berritasunak 2010eko abenduko Kapital Hitzarmenetik (Basilea III gisa ezagutzen da) datozen erakunde finantzarioen kaudimena kalkulatzean, eta Europako Parlamentuaren eta Kontseiluaren 2013/36/EB Zuzentarauak (CRD IV gisa ezagutzen da) jasotzen dituenak eta, batez ere, Europako Parlamentuaren Kontseiluaren 575/2013 EB Erregelamenduak (CRR gisa ezagutzen da) jasotzen dituenak, aplikatu beharreko hainbat aldi iragankorren mende daude. Behin betiko espezifikazio arauemaileak aplikatuta, aipatutako aldi iragankorrak pasatu izan balira bezala (fully loaded bertsioa), Kutxabank Taldearen Guztizko Kapitalaren Ratioa % 15,5ekoa izango litzateke.
Garrantzitsua da nabarmentzea Taldearen Baliabide Propio Konputagarri guztien osaeran kalitate handieneko kapitala dagoela (Core Tier One). Magnitude horretarako EBZk ezarritako arautze eta gainbegiratze errekerimenduak 2019rako % 8,2ko ratio batean gelditu dira.
Kutxabank Taldearen kaudimenaren posizio erlatiboa beste erakunde finantzarioekiko baloratzean, ezinbestekoa da kontuan izatea, Arriskuaren arabera Ponderatutako Aktiboak kalkulatzeko, Taldeak araudian aurreikusitako ikuspegi estandarizatuak erabiltzen dituela. Horrek, oro har, esan nahi du, kalkulu horretarako barne ereduak erabiltzen dituzten erakundeekiko, kapitalaren kontsumoa handiagoa dela arriskuarekiko esposizio berdin-berdinetarako. Distortsio metodologiko horrek ez dio eragiten Palanka Efektuaren Ratioari, % 8,10ean itxi baitu 2018ean (2017ko abenduan erregistratutako % 8,07aren aldean), hau da, Espainiako eta Europako sektore finantzarioen batezbestetikotik oso gainetik dago.